Со поддршка на проектот „На секое дете му е потребно семејство“, Општина Карпош преку своите 14-те урбани заедници, ќе се обиде да дојде до поголем број згрижувачки семејства за бездомни деца и деца без родители.
Основната идеја на овој проект е преку соработка на Министерството за труд и социјална политика, Центарот за социјална работа и Општината, да се информираат и детектираат потенцијалните згрижувачки семејства. На овој начин, може да им се обезбеден топол дом, љубов, нега, грижа и внимание на што повеќе деца без родители и родителска грижа, деца со воспитно-социјални проблеми или деца со посебни потреби. Раководителката на одделението за детска, социјална и здравствена заштита, Гордана Зафировска, ја пренесе поддршката од градоначалникот на Општина Карпош, Стевчо Јакимовски и додаде дека Општината реализира низа мерки и активности од областа на социјалниот и здравствениот живот.
-Наша цел е да ги информираме и анимираме граѓаните за функционирањето на згрижувачки семејства и да ги поттикнеме да се збогатат со уште едно детенце на кое му е потребна вистинска нега и љубов. Да потенцирам, дека Општина Карпош продолжува со активностите од областа на социјалниот живот.
Љубовта и грижата се една од најважните компоненти во семејството. Освен ова, потребни се станбени услови како и обезбедени материјални средства. За тоа, општина Карпош веќе ги потпомага социјалните семејства кои добиваат еднократна помош, но и преку бесплатните екскурзии и ужинки за учениците од прво и второ одделение.
Хуманитарните активности спроведени во текот на целата година, се токму за семејствата кои пружаат родителска љубов и грижа во семејството. Исто така, Општината ќе помогне и ќе ги поддржи семејствата кои што ќе згрижат едно или повеќе деца со тоа што ќе им се додели еднократна парична помош, давање помош во вид на хуманитарни пакети со прехранбени и хигиенски средства. Истите семејства ќе бидат ослободени од плаќање на надоместок за престој во предучилишни установи,а ќе добијат и бесплатни ужинки за училишни деца, стипендии за талентирани ученици или спортисти, како и парична помош за која се доделува по повод 3-ти декември, Денот на лицата со хендикеп за оние семејства кои би згрижиле дете со посебни потреби. Освен тоа овие деца и семејства ќе бидат вклучени во различни настани и проекти.