Блерим Ахмети, братот на „Ел Чека“ е притворен само затоа што повика на протест, обвини од собраниската говорница Зијадин Села од Алијансата за Албанците. Тој реагираше дека одлуките на судиите се политички и дека се спроведува селективна правда.
– Се претвораме во држава убиец. Има Недостаток на реформи, тоа се препораките на ЕУ поради кои не добивме датум. Блерим Ахмети е во притвор, тој повика на протест и тоа му е единствена вина. Има право на протест со Устав загарантирано и ние се претвораме во режим. Полицијата е во служба на партиите, обвини Села.
Села зборуваше за случаите со претепаниот Саздо и со прегазеното дете Алмир и пресудите за овие случаи, оценувајќи ги како неправедни, а се осврна и на тврдењата на просветниот инспектор кој се пожали на закани од министерот за образование и заменик министерот за внатрешни работи, дополнувајќи дека не може многу работи да се сменат во државата со министри како Садула Дураки.