Во Собранието на Република Македонија денеска седници ќе одржат комисиите за култура, образование и наука, за европски прашања, за здравство, за прашања на избори и именувања и за одбрана и безбедност.
Комисијата за одбрана и безбедност, која од четвртокот беше одложена за денеска, треба да расправа за предлог-законите за следење на комуникациите и за ОТА, како и за измените и дополнувањата на Законот за оружјето, во прво читање, кој е со европско знаменце. Овие измени се на дневен ред и на собраниската седница на Комисијата за европски прашања.
Пратениците на Комисијата за прашања на изборите и именувањата треба да ја утврдат Предлог – одлуката за разрешување и именување на претседател и членови на Управниот одбор на Агенцијата за цивилно воздухопловство. Тие исто така треба да гласаат за одлуки за промена на составот на пратеничките групи на Собранието со парламенти на други држави и на собраниски комисии.
Комисијата за култура ќе расправа за Предлог – националната стратегија за развој на културата во Република Македонија во периодот 2018 – 2022 година, со Акциски план за имплементација на Националната стратегија за развој на културата во Република Македонија за периодот 2018 – 2022 година, во второ читање.
На дневен ред на Комисијата за здравство се измените на Законот за комплементарна и алтернативна медицина, на Законот за санитарната и здравствената инспекција, на Законот за заштита од јонизирачко зрачење и радијациона сигурност, на Законот за лековите и медицинските средства, сите поднесени од пратеници од владејачкото мнозинство и во второ читање.