Во Парламентот денеска седници ќе одржат комисиите за образование, наука и спорт, за европски прашања, за одбрана и безбедност и Законодавно-правна комисија.
Комисија за образование, наука и спорт ќе ги разгледа Предлог-законот за изменување на Законот за Македонската академија на науките и уметностите и Предлог-законот за изменување на Законот за високообразовните установи за образование на наставен кадар во предучилишното воспитание, основното и средното образование, и двата во прво читање.
На дневен ред на оваа комисија се и статутарни одлуки за изменување на Статутите на Универзитетот „Гоце Делчев“ во Штип, прва фаза и на Универзитетот за информатички науки и технологии „Свети Апостол Павле“ – Охрид, исто така во прва фаза.
Предлог-законот за ратификација на Спогодбата помеѓу Република Северна Македонија и Европската унија за учество на Република Северна Македонија во „Европскиот корпус на солидарност“, во второ читање, е единствена точка на деневниот ред на собраниската Комисија за европски прашања.
Членовите на собраниската Комисија за одбрана и безбедност ќе дискутираат за Предлог – резолуција за Долгорочниот план за развој на одбранбените способности 2019 – 2028.
Законодавно-правната комисија ќе ги разгледа сите законски решенија кои се на дневен ред на овие собраниски комисии.