Во Собранието на Република Македонија седници денеска ќе одржат комисиите за финансирање и буџет, за труд и социјална политика, Комисија за европски прашања и Законодавно-правната комисија.

Комисијата за финансирање и буџет ќе продолжи со дебатата по амандманите за Предлог буџетот на РМ за 2013 година. Продолжува и расправата за амандманите за Законот за бранител на Комисијата за труд и социјална политика, со која ќе претседава пратеничката Сузана Анова.

Единствена точка на дневен ред на Комисијата за европски прашања ќе расправа по Предлог-закон за изменување и дополнување на Законот за заштита на природата во прво читање.

Членовите на Законодавно-правна комисија ќе расправаат по Предлог-законите за изменување и дополнување на Законот за хартии од вредност, на Законот за странци и на Законот за заштита на природата, сите во прво читање. Оваа Комисија ќе се произнесе и по Предлог-законот за ратификација на Договорот за воена финансиска соработка помеѓу Владата на Република Македонија и Владата на Република Турција и Протоколот за спроведување на финансиска поддршка помеѓу владите на двете земји, како и по Предлог – законот за ратификација на Осмиот дополнителен протокол на Уставот на Светскиот поштенски сојуз.