Во Собранието на Република Македонија денеска седници ќе одржат Комисијата за политички систем и односи меѓу заедниците, Комисијата за прашања на изборите и именувањата, Комитетот за односите меѓу заедниците и Законодавно-правната комисија.
На дневен ред на Комисијата за политички систем и односи меѓу заедниците се измените и дополнувањата на Законот за катастар на недвижности во второ читање.
Членовите на Комитетот за односи меѓу заедниците ќе ја разгледаат Предлог Програмата за работа на овој Комитет и Информацијата за спроведување и реализација на Охридскиот рамковен договор, изготвена од Секретаријатот за спроведување на Охридскиот рамковен договор.
На дневен ред на Комисијата за прашања на изборите и именувањата е Предлог-одлука за именување на член на Комисијата на Агенцијата за електронски комуникации.
Членовите на Законодавно-правната комисија ќе расправаат по измените и дополнувањата на Законот за персоналниот данок на доход, на Законот за квалитетот на земјоделските производи, на Законот за превоз на опасни материи во патниот и железничкиот сообраќај и на Законот за јавните патишта, сите во второ читање.
На седницата ќе бидат разгледани и измените и дополнувањата на Законот за земање и пресадување на делови од човечкото тело заради лекување во прво читање, измените и дополнувањата на Законот за катастар на недвижности во второ читање, како и неколку ратификации на договори.