Уставниот суд на денешната седница расправаше за уставноста на два закони и три подзаконски акти.

Судот поведе постапка за оценување на уставноста на членовите 4а и 21в од Законот за регистрирање на готовински плаќања во кој се предвидува купувачот да нема обврска да ја плати цената на услугата доколку продавачот не му издаде фискална сметка, како и глоба од 20 евра за купувачот доколку не побара сметка.

Постапката е поведена затоа што пропишување обврски за купувачот во ситуација кога продавачот како даночен обврзник не ги извршува своите обврски за плаќање на данок, не обезбедува да владее правото и не обезбедува слобода на пазар и претприемништво. Судот досега два пати интервенирал на одредби од овој Закон.

На денешната седница Уставниот суд не поведе постапка за член 22-б, став 2 од Законот за денацонализација. Во кој се предвидува плаќање на надоместок, а не враќање на градежно неизградено земјиште на кое со урбанистички планови е предвидено да се гради добро во општа употреба, објекти од јавен интерес или објекти за потребите на одбраната и безбедноста. Судот оцени дека ваквата законска одредба не е неуставна, имајќи предвид дека може да се ограничи приватната сопственост кога е во јавен интерес.

Уставниот суд не поведе постапка за членовите 14, 15 и 17 од Правилникот на фондот за здравствено осигурување кои се однесуваат на начинот на контролирање од страна на Фондот на јавните и приватни здравствени установи кои имаат договор со фондот за давање здравствени услуги.

Судот ја отфрли иницијативата од Правилникот на Министерството за одбрана, поточно за управување со кадри во военото разузнавање донесен во 2008 година. Иницијативата е отфрлена затоа што тој Правилник е внатрешен акт и нема дејства надвор од Министерството.

Судот ја отфрли иницијативата поднесена од граѓанин која се однесува на Одлука за привремено вршење на погребални услуги од страна на ЈП за Комунални услуги „Коминалец“-Гевгелија. Судот утврди дека овој акт не е пропис под належност на Уставниот суд со оглед дека се однесува на конкретно Јавно претпријатие и со привремено траење.