Собранието на Република Македонија на пролжението на 62. седница ја почна расправата за Предлог-законот за изменување и дополнување на Законот за земјоделско земјиште по скратена постапка. Целта на неговото донесување е да се овозможи земјоделското земјиште во државна сопственост да биде предмет на продавање под услови и на начин утврдени со закон.
Ивон Величковски од опозициската Либерална партија реагираше што овој предлог-закон и наредниот што е на дневен ред – Предлог-закон за продажба на земјоделското земјиште во државна сопственост – се донесуваат по скратена постапка. Смета дека без увид и стручна расправа се постапува неправилно и се создаваат нови услови за приватизација каква што имаше во 1990-тите.
– Создавате иста средина и исти последици како непромислениот начин на приватизација во 1990-тите години. Го поддржуваме концептот на приватна сопственост, но создавате услови мала екипа, владина или политичка олигархија, да одлучува за прашања од кои ќе зависи профитот и производството од земјоделското земјиште, рече Величковски.
Владејачкото мнозинство му возврати дека имало јавна расправа со земјоделците од која произлегле насоките за овој закон.
– Тезата дека нешто се прави заткулисно, не држи. За законот имаше јавна расправа и можевте да присуствувате таму, како и на седница на Комисијата за земјоделство, рече Малиша Станковиќ од Социјалистичката партија.
На барање на пратениците од ДПА, собраниската седница е прекината еден час.