Изборната кампања се вжештува, а се поостри стануваат и меѓусебните обвинувања на политичките противници. На социјалните мрежи се појави упатство за кое што се тврди дека е од изборниот штаб на Стевче Јакимовски, со кое активистите се советуваат да прават распореди за посета на граѓаните во нивните домови.
Во упатството пишува дека еден тим треба дневно да посети од 30 до 50 домаќинства, а од граѓаните треба да се добијат податоци кој ќе гласа сигурно за кандидатот Стевчо Јакимовски на 24 март.
„За нив се собираат следниве податоци: број на избирачко место, име и презиме, адреса, телефон, потпис и број на лица што се болни а за кои треба да се обезбеди гласање дома или во болница“, пишува во упатството и се додава начинот на кој тимовите ќе се претставуваат пред граѓаните.
„Добар ден, ние работиме во кампањата на Стевчо Јакимовски. Дали ќе ја дадете вашата поддршка за него на овие избори. Ако одговори со ДА, ќе сакате да го дадете вашиот телефонски број како знак на поддршка“, пишува во упатството.