Лидерот на ВМРО-ДПМНЕ, Христијан Мицкоски, бара распуштање на Владата и предвремени парламентарни избори. Смета дека Владата предводена од СДСМ, лошо ја води Македонија. Прашан дали парламентарните избори треба да се одржат заедно со локалните, тој вели: „Ние секојдневно бараме оставка од оваа Влада и создавање на услови за предвремени парламентарни избори – час поскоро“.
„Правно, треба 61 пратеник треба да кренат два прста во Собранието и на тој начин да се распушти Владата и да се закажат нови парламентарни избори. На друг начин не можеме да ги добиеме. А како ќе дојдеме до 61 пратеник, секојдневно работиме на тоа. Кога ќе имаме мнозинство, благовремено ќе информираме“, рече Мицкоски.
Прашан дали е оптимист дека ВМРО-ДПМНЕ ќе успее да обезбеди 61 пратеник за предвремени парламентарни избори, Мицкоски одговори само дека е оптимист дека Владата треба час поскоро да замине.
„Во овој момент не би сакал да откријам детали, бидејќи се работи на тоа ново парламентарно мнозинство. Во моментот кога ќе имаме 61 пратеник, ќе информираме. Дали е опфатен дел од пратеничката група на СДСМ – да, опфатен е“, рече Мицкоски за најавата дека работат на обезбедување на мнозинство, а прашан, кои пратеници се опфатени, додаде: „Па сега, ќе почекате малку“.
Најавите за ново парламентарно мнозинство, Христијан Мицкоски не ги кажува по првпат откако се одржаа изборите на 15 јули, кога ВМРО-ДПМНЕ ги изгуби избори. На почетокот на февруари тој кажа дека се крои ново парлемтарно мнозинство. Но и тогаш, тоа не се случи. По ова, се гласаше доверба на Владата, која доби поддршка од 62 пратеници, колку што брои и мнозинството.