Лекот Ивермектин кој се користи за лекување на заболени од Ковид-19 веќе е стигнат во земјава и од утре ќе се продава во аптеките ширум земјава, изјави директорот на Агенцијата за лекови и медицински средства (МАЛМЕД), Љирим Шабани.
Цената на лекот, како што посочи директорот, ќе изнесува околу 300 денари.
-Лекот е стигнат во земјава, се прават последни процедури за да се стави во промет и најверојатно од утре веќе ќе биде достапен. Цената на лекот ја одредува Министерството за здравство, но мислам дека ќе чини околу 300 денари, рече Шабани.
Тој минатата недела информираше дека се одобрени сите барања од болниците и веледрогериите кои ги исполниле услови.
– Дадовме одобрение за увоз и останува на компаниите на фармацевтските куќи кога ќе можат да го донесат лекот. Ни најавија дека има полициски час во неколку држави и дека тешко ќе биде за неколку дена да стигне лекот. Ние ги завршивме сите административни проедури и сега прашањето е техничко кога ќе можат тие физички да го донесат, имајќи предвид дека има лок даун во неколку држави заради празниците, изјави тогаш Шабани.
Ивермектинот, кој инаку се користи за лекување против паразити, ја забавува или целосно ја стопира делбата на коронавирусот кај еден дел од пациентите, покажаа неколку скорешни студии.
Министерот за здравство Венко Филипче неделава изјави дека Ивермектин ќе примаат некои ризични групи.
„Лекот ќе се дава на три групи граѓани и кај сите ќе има различно дозирање, поради што мора да се консултира лекар за неговата употреба. Станува збор за ризични групи на работници, лица кои имале потврден контакт и луѓе кои се заболени од Ковид-19. Различно дозирање има кај сите групи и затоа треба да биде под надзор на лекар“, рече Филипче.