Центарот за развој на Источно планскиот регион (ИПР) работи на изработка на Проектна програма за прогласување на Лесново за „Гео парк“. Директорката на Центарот за развој на ИПР, Драгица Здравева вели дека во изработката се вклучени и експерти.
– Вклучени се експерти кои ја знаат таа проблематика, да помогнат во изработката на таа Проектна програма, за да може да се направи апликацијата, која што треба да се поднесе и да може да почнеме со активностите за прогласување „Гео парк“ Лесново, вели Здравева.
Таа истакна дека изработката на оваа документација треба да заврши до крајот на летните одмори. Лесново ќе биде првиот гео парк во земајва под заштита на УНЕСКО. Просторот со раритетните форми и траги на вулканизам веќе го посетиле стручњаци од други вакви паркови во Европа. Општина Пробиштип и локалното население во Лесново прогласувањето на просторот околу нив за Гео парк сметаат дека со ова ќе имаат голем бенефит за развојот на туризмот.