Во Собранието почна седницата на Постојаната анкетна комисија за заштита на слободите и правата на граѓанинот, на која се разгледува претставката на здружението „16-ти март“ за трагедијата во кочанскиот „Пулс“, во која загинаа 63 лица, а над 210 беа повредени.
На седницата присуствуваат подносителите на претставката – родителите и блиските на загинатите. Воведното излагање го имаше Марија Петрушова, мајка на една од жртвите, која зборуваше во име на здружението. Таа побара вистинска правда за загинатите, „важна за сите деца во Македонија“, нагласувајќи дека трагедијата е резултат на системски пропусти и корупција. Петрушова побара случајот да се третира како прекршување на основните човекови права, особено правото на живот.
Во излагањето оцени дека е симптоматично што со истрагата и обвинението се опфатени само поранешни функционери и службеници од пониско ниво, додека одговорните кои ја вршеле функцијата и во времето на трагедијата не се опфатени.
„Државата драматично потфрли во борбата против корупцијата, големите остануваат над законот“, рече Петрушова.
На комисиската седница се одзваа и претседателката на државата Гордана Силјановска Давкова, претседателот на Владата Христијан Мицкоски и претседателот на Собранието Африм Гаши. Присутни се и координаторите на пратеничките групи, членовите на Комисијата, како и други пратеници, меѓу кои и лидерот на опозицијата Венко Филипче.
Седницата почна со минута молк во чест на жртвите од трагедијата.