Здружението за доброволна волонтерска работа „Кумановски акцијаши“ денеска, по повод 5 Jуни, Светскиот ден на животната средина, организираше акција за расчистување на мини „дивата“ депонија, долж патот кај Спомен Костурницата.
Се расчистува сметот, а екипите на ЈП „Чистота и Зеленило“ го складираат и депонираат.
– Го одбравме овој локалитет за еко акција зашто, покрај тоа што ја отсликува историјата, е и убаво излетничко-рекреативно место, многу близу до градот и наша цел, а верувам и на нашите сограѓани, е да биде чисто и привлечно за сите кумановци, изјави Јусуф Љатифи од здружението „Кумановски акцијаши“.
Тој апелира граѓаните совесно да се однесуваат кон непосредната животна средина.
И наредните денови, членовите на Зздружението ќе работат на расчистување на неколку различни локации во градот. Повикаа сите да се приклучат кон акциите за почиста и здрава средина.
„Кумановски акцијаши“ секој викенд организира еколошки акции за расчистување локации во градот. Годишното мото на одбележувањето на Светскиот ден на животната средина е „Поврзување на луѓето со природата“ и има за цел да ги потсети граѓаните да поминуваат повеќе време во природата, почитувајќи ја и грижејќи се за нејзино зачувување. Светскиот ден се одбележува во 140 држави во светот.