Под мотото „Сеуште постои избор, избери ја судбината“ и со ветување дека на народот ќе му ја вратат изворната социјалдемократија, СДУ вчера вечер, во Скопје ги претстави своите кандидати за градоначалници и носители на советнички листи на претстојните локални избори.
Претседателот на партијата и носител на листа на советници за град Скопје, Чедо Николовски рече оти ова е време на афирмација на вистинските вредности на изворната социјалдемократија.
„Овој моментум е вистинско време за нашата преобразба. СДУ е единствената граѓанска демократска партија во Македонија. За разлика од другите кои само ги делеа граѓаните ние веруваме во обединување, веруваме во демократијата, а посебно во внатрепратиската демократија“ рече Николовски.
Пред присутните на вечерашнава конвенција носителот на листа на советници за Битола Клаудија Лутовска постави прашање дали партија која мисли на два милиони Македонци е мала партија.
„Дали за луѓето во Македонија има гласачко тело и бројка или тоа се индивидуи? За СДУ во Република Македонија луѓето се индивидуи. Колективната свест можеби недостасуваше до овој момент, но ова е момент на прибирање на свеста на граѓанинот, моќта на граѓанинот, моќта на оној кој што живее во село и на оној кој што живее во град“, рече Лутовска.
СДУ на мартовските локални избори учествува со триесетина кандидати за градоначалници и педесетина советнички листи.
