Пред јавниот обвинител Марко Зврлевски е аудио доказ, потврден од референтен вештак, за поткуп и милионски кеш во случај во којшто е директно инволвиран Никола Груевски, граѓанин на функција премиер, со големи одговорности и поголема потреба за отчетност пред граѓаните.
Независно што јавниот обвинител Марко Зврлевски е избран на предлог на Владата на Република Македонија и може да биде разрешен на предлог на Владата, СДСМ го повикува јавниот обвинител Зврлевски во случајот Македонска банка да постапи професионално, според неговите законски обврски, се вели во писмената реакција на најголемата опозициска партија насочена кон ставот на јавниот обвинител Марко Зврлевски, кој денеска во изјава за Дојче Веле рече дека приватната тужба на премиерот Никола Груевски не може да влијае врз постапката на Јавното обвинителство за случајот „Македонска банка“.