„За голем број граѓани на Република Македонијa вечерва ќе биде најнеизвесната Нова Година којашто ќе ја дочекаат.
Снабдувањето со електрична енергија е критично во неколку региони низ државата. Голем број населени места во Западна Македонија се отсечени заради непроодност на патиштата.
До дежурните комисии на СДСМ постојано пристигнуваат информации и апели за помош од граѓаните.
Новаци, Могила, Струга и струшко, Охрид и охридско, Чашка, Маврово Ростуше, Дебар и дебарско, Долнени, Дебарца и многу други вечерва се најзагрозените места во Западна Македнија кои ќе ја дочекаат Новата година на свеќи и во темнина или завеани и отсечени од снежните наноси.
Од вечерва и термоелектраната Осломеј е надвор од системот. Според информациите коишто ги добиваме континуирано, во термоелектраната нема мазут.
Ситуацијата во РЕК Битола, исто така е алармантна. Дефектите на бренерите за мазут, дополнително ја отежнуваат работата на два од трите блока на термоелектраната и заради тоа често се случуваат испади од системот за снабдување со електрична енергија.
Во врска со МЕПСО, трансформаторската станица кај Вруток работи со високи оптоварувања, поточно 110 kV ТС е напојувана само со една далекуводна врска која е преоптоварена и не се знае до кога ќе издржи. Другата трансформаторската станица, 110 kV ТС е во прекин веќе подолг период.
Ситуацијата во Тетовско Гостиварскиот регион поради ова е критична.
СДСМ има дежурни екипи кои будно ја следат состојбата на теренот, со електроенергетскиот систем во државата и веднаш ќе алармира, во интерес на граѓаните.
СДСМ е со граѓаните додека неодговорната власт, којашто со своите погрешни политики го доведе електро системот пред колапс, се спрема да ја слави Новата Година“, се вели во соопштението на СДСМ.