Владејачката партија СДСМ, реагираше на обвинувањата на Наум Стоилковски од ВМРО-ДПМНЕ кој на прес-конференција објави инсерт од видео на кој се гледа како премиерот повикува сопственици на компании и бизнисмени да ветуваат или даруваат подарок за работниците, во замена за глас на референдумот.
Оттаму велат дека Заев е премиер посветен на градењето социјална држава и поради тоа се грижи за стандардот на работниците.
„Поддршката за домашните претпријатија од страна на државата е силен поттик за менаџерите на компаниите да ги покачат платите на работниците. Само мотивирани работници може да ја креираат економијата, да бидат нејзин двигател. Само така можеме да обезбедиме квалитетен живот, достоинствени работни места, пристојни плати и пензии, напредна и просперитетна Македонија“, се наведува во партиското соопштение.
Додаваат и дека премиерот ќе продолжи да биде мотиватор и поддржувач на работниците во борбата за обезбедување подобри работнички права и повисоки плати.