СДСМ го осудува нецивилизираниот чин на кандидатот на српската напредна странка, Стевчо Јакимовски, кој, и покрај уредното барање од страна на СДСМ не дозволи да се одржи митинг на СДСМ и „Сојузот за иднината“ на игралиштето во населбата Карпош 1.
„И покрај уредно доставено барање уште пред седум дена, во текот на денешниот ден, само два дена пред планираниот митинг на Сојузот за иднината, информирани сме дека кандидатот на Српската напредна странка не дозволува опозицијата во Карпош да одржи митинг на кој ќе ги претстави своите кандидати.
– Новиот адут на премиерот и резервен кандидат на ВМРО-ДПМНЕ во Карпош веќе се однесува како Никола Груевски. Очигледно стравот на Јакимовски, кој воопшто не нè изненади, е толку голем што се обидува на секаков начин да ја попречи кампањата на опозицијата.
– Секој што мисли дека на ваков или на сличен начин може да ја промени волјата на граѓаните се лаже. Ваквите испади само ќе ја зајакнат определбата на карпошовци да гласаат за СДСМ и Андреј Петров“, се вели во соопштението на СДСМ.
