Претседателот на СДСМ, Зоран Заев и генералниот секретар, Оливер Спасовски, доцна попладнето остварија средба со поранешните и актуелните градоначалници од редовите на Социјалдемократскиот сојуз на Македонија, од осамостојувањето на државата до денес.
На средбата со жалење беше констатирано дека состојбата во која што се наоѓа Македонија е повеќе од загрижувачка.
„Уништена е економијата, нема слобода, нема демократија, нема владеење на правото. Младите генерации излезот го гледаат во пасоши од соседните земји, коишто беа далеку поназад од Македонија, а сега веќе се далеку пред нашата земја во евро – атлантските интеграциски процеси. Сите градоначалници од редовите на СДСМ, на вечерашната средба дадоа поддршка на одлуката на СДСМ и коалициските партнери за непризнавањето на изборниот процес, неприфаќањето на пратеничките мандати и за истрајност во барањето за создавање услови за формирање техничка влада, што ќе биде гаранција за слободни, фер и демократски избори“ – велат од СДСМ.
Претседателот Заев истакна дека целта на СДСМ е искрена, исконска и праведна, државата да се врати на вистинскиот пат. Тој додаде дека тие се луѓе коишто значат многу во средините кадешто биле или се градоначалници и дека нивните размислувања и сугестии ќе бидат сериозно земени предвид во Стратегијата
за вонинституционално дејствување на опозицијата и наредните чекори кон нормализирање на државата.
