Го поддржуваме предлогот пратеници да бидат само лица кои имаат единствено македонско државјанство, но тоа да важи и за сегашниот собраниски состав, соопшти денеска Социјалдемократскиот сојуз.
„СДСМ поддржува пратеници да бидат лица кои имаат единствено македонско државјанство, но тоа да важи и за пратениците од актуелниот пратенички состав. Исто така, предлагаме пратеници да не може да бидат лица кои се осудувани за кражби во други држави, како на пример лицето Антонио Милошоски, односно лица кои со своите незаконски дела го нарушуват имиџот на земјата,“ велат од партијата.
„Сепак, поважно од сѐ, наместо да чека законски измени, пратеникот Антонио Милошоски, како осудено и казнето лице во Германија за кражба, за кого се водат предмети пред македонските судови треба да си даде оставка,“ додаваат од владејачката партија.
ВМРО-ДПМНЕ денеска предложи измени во два члена од Законот за пратеници и тоа во условите за избор на пратеници, каде што предлагаат додавање нов член во кои се вели дека за лицето да биде избрано за пратеник треба да го исполнува условот, покрај другите, да е државјанин само на Република Македонија.
