СДСМ обвини дека премиерот Христијан Мицкоски врши директно влијание врз работата на обвинителството и побара оставка од обвинителот Ненад Савевски, поради, како што велат, сомнежи за нарушена независност на институцијата.
Од партијата тврдат дека „Мицкоски нарачува, а Савевски испорачува“, оценувајќи дека станува збор за пример на, како што наведуваат, „партизирано судство и обвинителство“.
Според СДСМ, веќе 160 дена нема одговор од обвинителството за, како што велат, „криминалните тендери“ што ги објавил нивниот Антикорупциски тим.
Од партијата ги посочуваат случаите со, како што тврдат, 161 тендер за семејна фирма на Томовски, 51 тендер преку општини за фирмата „Пирамид Билдинг“, 74 тендери за „Ленди груп“, како и доделување 9 милиони евра на фирма со двајца вработени и тендер од 1,2 милиони евра преку Пошта за фирма, за која велат дека е блиска до ЗНАМ.
СДСМ прашува и зошто нема постапување по кривичната пријава поднесена против премиерот Мицкоски.
„Нема правда, има контролирано судство и обвинителство лично од Мицкоски“, соопштија од партијата.
Оттаму додаваат дека не гласале за изборот на Савевски токму поради сомнежи во неговата независност, оценувајќи дека актуелните случувања, според нив, ги потврдуваат тие стравувања.