„ВМРО-ДПМНЕ со месеци ја блокира работата во Собранието, со што нанесува континуирана штета на угледот на Собранието и штета на граѓаните. Работата на Комисијата за избори и именувања со месеци е закочена, а таа е важна за избор и именување на составите на важни државни институции“, соопшти СДСМ.
„ВМРО-ДПМНЕ ги блокира измените на Законот за наставниците и стручните соработници во основното и средното образование кој обезбедува повисоки плати за 27.000 наставници.
Исто така е блокиран и Законот за служба во Армијата кој носи подобри услови за пензионирање на војниците, можност на војниците да бираат дали ќе продолжат во јавна служба или ќе добијат надомест до 20,000 евра.
Повеќе од една година е блокирана и изградбата на нов Клинички центар во Скопје.
ВМРО-ДПМНЕ го прави сето ова поради нивниот дебакл при формирање ново парламентарно мнозинство и за да покријат неспособноста на нивните градоначалници.
Парламентарното мнозинство предводено од СДСМ има обврска и одговорност да ги откочи блокадите на опозицијата и ќе стори се, за сите важни закони за граѓаните да бидат донесени. Блокадите, опструкциите на ВМРО-ДПМНЕ и парламентарната опозиција нема да им успеат“, се наведува во соопштението на СДСМ.