„Според нашите информации, општината не го испочитувала договорот за Јавно приватно партнерство и намерно го кочи во работата приватниот партнер, поради што 50 вработени се отпуштени од работа.
Долго најавуваниот проект за изградбата на деловно-административна зграда со површина од околу 1100м2 во централното градско подрачје на Крива Паланка, доживеа фијаско на самиот старт.
Официјалното отворање на зградата се случи на 25 Август, а јавноста нестрпливо ги очекуваше најавуваните нови 50 работни места преку линијата на супермаркети на фирма од Куманово. Само четириесетина дена по свеченото отворање, закупецот на деловните простории, деновиве ги отпушти вработените и почна да ја пакува опремата.
Дали вака ВМРО-ДПМНЕ гради партнерски односи со бизнис секторот?
Каква порака испраќа ВМРО-ДПМНЕ до следните инвеститори кои евентуално би ја посетиле општината?
Чии интереси штитат првите луѓе на општината, своите лични или општите интереси на локалната заедница?
Кој ќе ги плаќа трошоците и пеналите на приватниот партнер поради неработењето во следниот период, а со тоа и не неможноста да си ја поврати инвестицијата од околу 550.000 илјади евра?
Чија е вината што бројка на невработени во општината е за 50 лица поголема?
Oва не е прв ваков случај, бидејки пред неколку години чевларски погон кој имаше над 300 вработени мораше да се пресели во Скопје. Во најава е дека уште еден чевларски погон наскоро планира својата инвестиција да ја премести во Врање, соседна Србија.
Го прашуваме премиерот Груевски и ВМРО-ДПМНЕ, дали суштината на кампањата „Инвестирајте во Македонија“ е „Избркај ги инвеститорите“, се вели во соопштението на СДСМ Крива Паланка.