На Стоилковски не му пречеше загадувањето кога ги бранеше политиките на Груевски, денес се преземаат системски мерки, а бројот на денови со висока загаденост опаѓа, реагираат од СДСМ на прес-конференцијата на Наум Стоилковски од ВМРО-ДПМНЕ.
„11 години ВМРО-ДПМНЕ го игнорираше проблемот со аерозагадувањето, а преку погубните политики и директно го поттикнуваше загадувањето.
Непланските градби, масовното уништување на зеленилото заради лични бизнис интереси придонесоа загадувањето енормно да се зголеми а последиците се чувствуваат и денес.
Тогаш на Наум Стоилковски не му пречеше загадениот воздух бидејќи како новинар до последно ги бранеше криминалните политики на Никола Груевски.
За разлика од таквиот пристап на ВМРО-ДПМНЕ кон загадувањето, денес владата предводена од СДСМ и сите институции со системски мерки се борат против загадувањето.
Се инвестира во замена на старите и нееколошки начини на загревање на јавни објекти и приватни домови, се подигнуваат нови зелени површини, се субвенционираат трошоците за замена на нееколошките возила со погон на гас, метан и струја, интензивно се работи на гасификација.
Владата предводена од СДСМ издвои 5,4 милиони денари за замена на постоечките загадувачки системи за греење на јавни објекти во Куманово.
Наскоро пристигнуваат 33 еко автобуси за јавниот превоз во Скопје, со што ќе се замени дел од стариот и нееколошки возен парк во јавниот превоз.
10 милиони евра се обезбедени за субвенционирање на инвертори за 10.000 семејства, а со намалување на ДДВ за парно, се очекува да порасне бројот на нови корисници на овој еколошки начин на загревање.
Предизвици се уште постојат бидејќи се работи за комплексен проблем, но бројот на денови со висока загаденост во текот на годината, кој во последните две години се намалува покажува извезен напредок во решавање на овој децениски проблем.“, се наведува во реакцијата на партијата.