Државата и граѓаните останаа без 100 милиони евра од ЕБОР во време на криза, поради деструктивноста на Христијан Мицкоски и ВМРО-ДПМНЕ, велат од владејачкиот СДСМ.
„Европската банка за обнова и развој го сопре заемот што требаше да го земе Македонија за справување со енергетската криза во вредност од 100 милиони евра. Причина за сопирањето е блокирање на законот за таа намена од страна на ВМРО-ДПМНЕ и Мицкоски. Сега ВМРО-ДПМНЕ и Мицкоски нека им ги вратат парите на граѓаните. Како ниедна опозиција во светот, како ниеден политичар во светот ВМРО-ДПМНЕ и Мицкоски наместо да помогнат тие дополнително ја отежнуваат состојбата во време на светска економска и енергетска криза“, велат од СДСМ.
Како што додаваат, за разлика од таквиот деструктивен однос, претседателот на СДСМ Димитар Ковачевски обезбедил 80 милиони евра од ЕУ за директна поддршка за справување со енергетската криза.
„Очигледна е разликата помеѓу одговорниот државнички пристап на Ковачевски и деструкциите и неодговорното однесување на Мицкоски и ВМРО-ДПМНЕ кои по секоја цена дејствуваат на штета на државата и граѓаните“, велат од СДСМ.
