Во Клубот на пратениците се одржува средба на Работната група на претставниците на политичките партии потписници на Договорот од Пржино со посредникот Питер Ванхауте.
На пауза на средбата изјава даде и Дамјан Манчевски од СДСМ кој истакна дека до останатите учесници на преговарачкиот процес во работната група доставивиле предлог со кој што, како што сметаат од партијата, на ефикасен и едноставен начин може да се разрешат останатите две горливи прашања за услови за фер и демократски избори – тоа се прочистувањето на Избирачкиот список и реформите на медиумите.
– СДСМ е подготвен да ги повлече своите забелешки во однос на методологиите за прочистување на Избирачкиот список доколку останатите учесници на преговорите се подготвени да ги прифатат предлозите на меѓународната заедница за реформи на медиумскиот сектор. Прочистувањето на Избирачкиот список и реформата на медиумите се основа и предуслов за фер и демократски избори. Ако ова не е прифатливо за ВМРО-ДПМНЕ и останатите учесници во преговорите тогаш тие не сакаат во Македонија да имаме фер и демократски избори, рече Манчевски, не појаснувајќи кои се предлозите на меѓународната заедница, туку само кусо истакна дека тие се веќе познати.
На средбата учествуваат претставнции на ВМРО-ДПМНЕ, СДСМ, ДУИ и ДПА, како и меѓународни претставници.