„Регулаторната комисија за енергетика изминатиов период донесе одлуки на директна штета на потрошувачите. СДСМ ја дели загриженоста на граѓаните на стартот од грејната сезона. Со оглед на економската криза и растечката сиромаштија на сè поголем број семејства во државата, стравот од ценовниот шок е оправдан и разбирлив. И покрај бројните реакции, членовите на Регулаторна и нејзиниот претседател, инаку кадар на ВМРО ДПМНЕ избран од страна на владејачкото мнозинство, не покажаа слух за проблемите предизвикани од нивните одлуки кои директно ги загрозуваат граѓаните“, изјави Александар Наумовски.
СДСМ ја потсетува јавноста дека спорните одлуки на Регулаторна биле донесени во време на летните одмори, на нетранспарентен начин и со крајно сомнителна методологија. Според анализите на Хелсиншкиот комитет, 11 од 15 прописи се донесени врз основа на погрешни или непрецизни одредби од Законот за енергетика. Токму врз основа на тие сомнителни прописи, велат, беше зголемена цената на топлинската и електричната енергија. Со истите прописи им беше наметната обрска да плаќаат парно и оние кои не го користат, наметнувајќи им забрана за нови исклучувања од мрежата. Дополнително оптоварување за граѓаните беше и тоа што се укина и евтината струја.
Ако авансните сметки за парно во август се зголемија за речиси 25% проценти, споредено со истиот период лани, граѓаните оправдано стравуваат од сметките во најстудените зимски месеци, кои може да бидат само повисоки од сегашните, велат од СДСМ.
„Затоплениот дом веќе станува луксуз за просечното македонско семејство, кое треба да крати од другите потреби за да ги подмири овие трошоци. Затоа, во оваа прилика сакаме да го повториме барањето кое во август годинава го доставивме до премиерот Груевски, за разрешување на членовите на Регулаторната комисија кои работат спротивно на интересот на граѓаните, како и за итно преиспитување на одлуките на Комисијата. Бараме да престане игнорантскиот однос кон нашите барања, особено кога тие се директно поврзани со влошената социјална состојба на граѓаните и да се преземат мерки со кои ќе се корегираат штетните правилници.Затоа уште еднаш ја повикуваме Владата да интервенира и да им излезе во пресрет на граѓаните. Ги повикуваме Народниот правобранител и Организацијата на потрошувачи да застанат во одбрана на правата на корисниците на парното и да преземат мерки против самоволието на Топлификација“, рече Наумовски.
