Граѓаните се прашуваат разбира ли воопшто ВМРО-ДПМНЕ што се државни инистутции и како не можат да направат разлика што е партија, а што државна институција, велат од СДСМ.
„Очигледно за ВМРО-ДПМНЕ единствена институција е нивниот Центар за комуникации. Оттаму обвинуваат таму пресудуваат.
Наместо прес конференции на кои се вадат стари обвинувања, државните институции, под контрола на ВМРО-ДПМНЕ, нека повелат, вратите на општина Струмица им се отворени.
СДСМ по којзнае кој пат прашува кога Никола Груевски ќе одговори:
Дали е непотизам и судир на интереси назначувањето на првите братучеди и кумот на премиерот Груевски за контролори на севкупниот општествен и стопански живот во Македонија, преседан незабележан во поновата политичка историја на Европа?
Дали Сашо Мијалков, братучедот на Никола Груевски се стекнал со фантастични една милијарда евра?
Како Гордана Јанкулоска, Влатко Ѓорчев и други високи функционери на ВМРО ДПМНЕ, се збогатиле од чиновнички плати?
Дали Груевски, Мијалков и Ставрески се мозокот на операцијата во којашто, во последниве 7 години, се одлеани повеќе од 3,5 милијарди евра пари на граѓаните во непознат правец и во приватни џебови“, се вели во писмената реакција на СДСМ на денешната прес конференција на ВМРО – ДПМНЕ.