На денешната седница на Советот на општина Карпош, коалицијата ВМРО-ДПМНЕ- ГРОМ, изврши незаконски упад во училишните одбори на 7 основни училишта на територијата на Карпош, велат од СДСМ.
Според нив, Советот на општина Карпош, противзаконски, разреши 11 членови на училишни одбори, без никакво образложение. Во извештаите на директорите на училиштата немаше ниту една забелешка на работењето на разрешените членови.
Најголем дел од членовите се разрешени на половина мандат.
Коалицијата ВМРО-ДПМНЕ – ГРОМ, којашто освен на општинско ниво во Карпош, веќе функционира и на државно ниво, денеска во Советот на општина Карпош веднаш на испразнетите места именуваше нови членови на училишните одбори.
Прашуваме, дали на состанок одржан пред 5 дена, на 10.07.2014 година, лично градоначалникот Стевчо Јакимовски на директорите на споменатите 7 училишта им наложил, точно со имиња и презимиња, кои членови да бидат разрешени?
Дали Стевчо Јакимовски договорил со Никола Груевски директорски фотељи за ВМРО-ДПМНЕ во училишта во општина Карпош?
И, дали денешните разрешувања му беа потребни на Стевчо Јакимовски, за новоизбраните членови да послужат како гласачка машинерија за промена на директорите во седумте училишта, како резултат на коалициската поделба на местата помеѓу партиите ГРОМ на Јакимовски и ВМРО-ДПМНЕ на Никола Груевски, прашуваат од СДСМ.