СДСМ по последното поскапување на цената на бензините апелира Владата да направи краткорочна и долгорочна стратегија за справување со ценовните шокови и бара привремено да се откаже од дел од акцизата за горивата и да влијае на државните ЕЛЕМ и МЕПСО да ги скратат непродуктивните трошоци и да побараат намалување на цената на струјата.
„За само две недели од последното покачување на цените Регулаторната комисија за енергетика донесе нова одлука со која цената на бензинот ја зголеми за нови 2 денари, а на дизелот за нови 3 денари или вкупно за само еден месец цената на нафтените деривати се зголеми во просек за 7 денари по литар. Тенденцијата покажува дека за жал тие и понатаму ќе се зголемуваат“, рече Марјанчо Николов од СДСМ на денешната партиска прес-конференција.
Ако се земе предвид, нагласи, и скорешното зголемување на цена на струјата за 10 отсто и на парното за 4 отсто, цените на сите енергенси се зголемени, што претставува сериозен удар врз граѓаните и компаниите.
Долгорочно, СДСМ бара Владата да направи план за инвестиции во енергетски проекти со кои за период од 8-10 години би се изградиле нови капацитети што би обезбедиле поевтина енергија за граѓаните и стопанството и би ја направиле земјава независна од увоз на струја.