СДСМ бара итна смена на министерот Иван Стоилковиќ, обвинувајќи го дека учествува во политичка кампања во Србија и дека со своите активности ја поддржува, како што велат од партијата, „српско-руската агенда“.
Од СДСМ реагираат на појавувањето на Стоилковиќ во Битола заедно со Милица Ѓурѓевиќ Стаменковски – Заветница, министерка во техничката влада на Србија. Во соопштението партијата ги наведува нејзините ставови за НАТО, Русија и војната во Украина, како и нејзините изјави поврзани со Сребреница и Ратко Младиќ.
„Таа јавно изјави: во Сребреница не се случил геноцид. Тоа е спротивно на правосилни пресуди на меѓународните судови. За Ратко Младиќ вели: генерал на Република Српска, човек што го бранел народот. Младиќ е осуден воен злосторник“, наведуваат од СДСМ.
Партијата го обвинува Стоилковиќ и за поддршка на претседателот на Србија, Александар Вучиќ, како и за учество во активности поврзани со Србија, меѓу кои и, како што тврдат, организирање превоз за митинг во Белград.
СДСМ тврди и дека македонски државјани биле запишувани во избирачкиот список во Србија и дека биле обезбедувани српски пасоши за гласање.
„Ова што го прави македонскиот министер Стоилковиќ – тоа е мешање во изборен процес на друга држава. Министер од Македонија нема што да бара таму“, велат од СДСМ.
Од партијата бараат Стоилковиќ да биде разрешен, оценувајќи дека неговото учество во политички активности во Србија е несоодветно за македонски министер.