Повторно се случи голема хаварија во РЕК Битола и повторно, штетата се изразува во милиони денари. Овојпат “жртва“ на лизгањето на земјиштето беше најголемиот јагленосен багер КУ(ка-у) – 300 кој делумно е затрупан, онеспособен и оштетен. Ние сме свесни дека некои работи не можат да се предвидат, посебно ако зависат од каприците на природата, но често, пред ваквите несреќи постојат индиции кои не смеат да бидат игнорирани, велат од СДСМ.

Го прашуваат раководствата на А.Д ЕЛЕМ и РЕК Битола:

• Зошто со соодветни техники на ископ не се изврши навремено растеретување на критичната локација?
• Зошто, оваа хаварија се случува по втор пат на истото место, само што овој пат штетите се многу поголеми? Очигледно, некој или не сака или не може нешто да научи од сопственото искуство.
• Како вработените во РЕК Битола да се чувствуваат безбедни кога во комбинатот хавариите станаа правило наместо исклучок?
• Колку овојпат е предизвиканата директна или индиректна штета и како таа ќе се одрази врз идното покачување на цената на струјата?

На крајот, велат, би можеле да го извлечеме следниот логичен заклучок, изминатите 7 години ВМРО-ДПМНЕ мисли само како да ги задоми своите партиски војници наместо да го сочува нашиот најголем рударско-енергетски комбинат и безбедноста на неговите вработени. Со нивната политика директно се загрозени иднината на РЕК Битола и самоодржливоста на електро – енергетскиот систем на нашата држава.

Токму затоа, граѓаните на Р.М. ќе ја поразат ваквата штетна политика на неизбежните предвремени парламентарни избори.