Реквизитите на дваесетина детски игралишта во Кочани во најголем дел се целосно обновени или поправени. Општината, во соработка со Комуналното јавно претпријатие „Водовод“ го искористи претходниот период за санирање на оштетената опрема, откако беше направен увид и изработен план за дејствување.
– На почетокот на пролетта, завршена е реконструкцијата на 70 проценти од детските игралишта во Кочани и во населените места. Целта е да се подобри состојбата и да се избегнат опасностите за безбедноста на најмладите, соопшти градоначалникот на Кочани, Николчо Илијев при обиколката и увидот на игралиштата во Градскиот парк.
Според градоначалникот Илијев, Одделението за урбанизам при Општина Кочани има задача при изработката на деталните урбанистички планови да планира изградба на нови детски и повеќенаменски спортски игралишта, со цел да ги има во секоја урбана и месна заедница. Притоа ги повика граѓаните да упатат иницијативи за да се согледаат реалните потреби во секој дел од општината.
Наредниот период интензивно ќе се работи на поправка на повеќенаменските игралишта, при што таму каде што ќе има покрупни зафати ќе се работи по јавен повик.
Повикувајќи ги децата што повеќе да бидат во природа и да се рекреираат, градоначалникот Илијев повикува на совесно користење на целата опрема, зашто, како што рече, безбедноста на децата е најважна.