Собранието на Македонија денеска треба да ја почне 42. седница, на која ќе биде верификуван пратеничкиот мандат на Садије Илјази од ДПА, која на оваа функција доаѓа на местото на Арбен Џафери.
На дневен ред на седницата се измените и дополнувањата на Законот за електронските комуникации во второ читање, Предлог законот за престанување на важењето на Законот за обезбедување на средства за финансирање на програмата за изградба на железничката пруга Куманово – Бељаковце – Крива Паланка – Деве Баир (граница со Република Бугарија) во 1994, 1995 и 1996 година, во второ читање, како и дополнетите предлог закони за изменување и дополнување на Законот за животната средина и на Законот за управување со отпад, двата во второ читање.
Пратениците ќе се изјаснат и за Предлог-законот за гаранција на Република Македонија на обврските по Договорот за заем за Проектот „Набавка на нови влечни и влечени средства во МЖ Транспорт АД-Скопје меѓу Европската банка за обнова и развој и МЖ Транспорт АД-Скопје“, по скратена постапка, за измените и дополнувањата на Законот за Филмскиот фонд на Република Македонија, на Законот за културата, на Изборниот законик, на Законот за финансирање на политичките партии и на Кривичниот законик, во прво читање, како и по предлог законите за граѓанска одговорност за навреда и клевета, за странската информативна дејност во Република Македонија, исто така во прво читање.
На дневен ред на оваа седница, меѓу другите точки се и измените и дополнувањата на Законот за земјоделство и рурален развој, по скратена постапка, предложени од пратениците на владејачкото мнозинство.