Рускиот пејач Олег Газманов ќе покрене постапка за плагијаторство на неговата песна „Москва“, која овде Владо Јаневски ја пее како една од химните на митинзите на ВМРО-ДПМНЕ, насловена како „Напред“.
Откако ја добил информацијата, рускиот пејач Олег Газманов констатирал дека песната „Напред“ е сосема иста и копирана од неговата „Москва“. Пејачот барал и добил информации дали песната што ја пее Владо Јаневски се емитува на радио и телевизиските станици во Македонија, дали се користи за партиски митинзи.
Олег Газманов целата работа му ја препушти на неговиот менаџер, Филип Роса, кој за А1он потврди дека никој од Македонија не побарал дозвола за преработка на песната и очигледно некој тоа го направил на своја рака.
„Ние востановивме дека такво одобрение не сме дале и подготвени сме да се обратиме на меѓународниот суд“, изјави за А1он менаџерот на рускиот пејач, Филип Роса.
Олег Газманов е познат во Русија по неговите патриотски песни за руската држава и за руската моќ. Владо Јаневски не успеавме да го добиме за изјава и останува отворена понудата до него доколку сака да го каже својот став. Во видеото се двете песни споени во една, со цел да да се направи подобра споредба.
Темјана Поповска