Издавачката куќа „Икона“ го објави на македонски јазик хрватскиот бестселер „Фрида или за болката” на познатата писателка Славенка Дракулиќ, кој е продаден во повеќе од 10.000 примероци и преведен на англиски од најголемиот светски издавач „Пингвин“. Книгата е еден вид биографија на славната мексиканска сликарка Фрида Кало, сопруга на прочуениот сликар Диего Ривера.
– Но „Фрида или за болката” не е толку животопис на Кало, колку што е интимен опис на болката, а во таа смисла и на животот како болка. Љубовта и болката се опсесивни теми за Славенка Дракулиќ, а во Фрида Кало пронашла хероина која и овозможила да ги истражи најдлабоките и најосновни чувства кај човекот. Фрида, и покрај постојаната и неподнослива болка предизвикана од многубројните операции, живеела интензивно и исполнето. Нурнувајќи се во нејзиниот свет, со многу деликатност, Дракулиќ напиша фасцинантен роман во кој постојано се испреплетуваат јазикот на болката и јазикот на љубовта, соопшти издавачот.
Славенка Дракулиќ (Риека, 1949,) е меѓу најпознатите и најпреведуваните писателки на Хрватска. Објавува есеи, романи и стручна литература и пишува за повеќе весници и списанија. Нејзини најпознати книги се: „Балкан Експрес“ (1992), „Кафе Европа“ (1996), „Како да ме нема “ (1999) „Басни за комунизмот“ (2009)… Во 2005 година ја доби „Лајпцишката книжевна награда за европско разбирање“. Славенка Живее во Шведска и во Хрватска.