Ризично е водоснабдувањето кај пет проценти од населението во општините Кавадарци и Росоман. Станува збор за 2.142 жители кои пијат вода од локални селски водоводи, природни чешми и бунари.
Градот Кавадарци, селата приклучени на градскиот водовод Лукар и селата со локален водовод каде се врши хлорирање на водата со вкупно 40.740 жители или 95 отсто од вкупното население во двете општини, редовно се снабдуваат со хигиенски исправна вода за пиење.
Ова го покажува извештајот за следењето на состојбата на водоснабдувањето и квалитетот на водата за пиење во општините Кавадарци и Росоман во 2017 година, изготвен од Центарот за јавно здравје Велес, подрачна единица Кавадарци.