Ревијално возење моторцикли ќе се одржи денеска низ струшките сообраќајници. Ова е дел од воспитно-едукативната акција „Недела за безбедност на моторциклистите во Република Македонија“ чија цел е да се испрати апел за поголема безбедност на моторциклистите поради нивната се’ поголема присутност во сообраќајот.
– Денешното возење моторцикли треба да ја покаже заложбата на членовите на моторциклистичките клубови и здруженија на моторциклисти од Струга за безбедно и внимателно управување моторцикл, за почитување на сообраќајните правила и прописи, како и за задолжително користење на заштитните шлемови, информира портпаролот на СВР Охрид Стефан Димоски.
Ревијалното возење низ сообраќајниците на Охрид, ќе се реализира со присуство на мотопатролите на струшката полициска станица за безбедност во патниот сообраќај.
Акцијата „Недела за безбедност на моторциклистите во Република Македонија“ е заеднички проект на Министерството за внатрешни работи на Република Македонија и Републичкиот совет за безбедност на сообраќајот на патиштата.