Ректорот на Универзитетот „Св. Кирил и Методиј“ во Скопје и претседател на Управниот одбор на Институтот „Конфуциј“, проф. д-р Велимир Стојковски, во Ченгду, Сечуан, Кина, одржа пристапно предавање и беше промовиран во почесен професор на Југозападниот универзитет во Ченгду.
Ректорот Стојковски титулата почесен професор на Југозападниот универзитет во Ченгду, соопштија денеска од Универзитет „Св. Кирил и Методиј“ во Скопје, ја добил како знак на признание за неговиот придонес во науката и образованието, унапредувањето на меѓууниверзитетската соработка, зајакнувањето на македонско-кинеската соработка, како и за неговиот личен придонес за формирањето, успешната работа и развојот на Институтот „Конфуциј“ во Република Македонија при УКИМ.
Институтот „Конфуциј“ во Република Македонија при УКИМ беше свечено отворен и започна со работа на 3 септември 2013 година во рамки на одбележувањето на 20-годишнината од воспоставувањето дипломатски односи помеѓу Република Македонија и Народна Република Кина, како резултат на желбата за зајакнување на соработката во областа на образованието меѓу Народна Република Кина и Република Македонија, со поддршка на владите на двете земји.