Повторно се разгоре пожарот околу манастирот Трескавец кај Прилеп кој вчера беше ставен под контрола.
Според командирот на противпожарната единица Станко Колески, кој моментално е на теренот со екипите и доброволците, пожарот се обновил околу 9 часот изутрината.
– Одненадеж се обнови пожарот кај предавателите околу манастирскиот комплекс Трескавец. Во моментов огнот го гаснат и се обидуваат да го пресечат повеќе од 60 луѓе, пожарникари, доброволци, помош од прилепските фирми, изјави Колески.
Инаку, уште се активни и двата други пожари во прилепско, кај селата Никодин и кај Бонче-Крушевица, мариовско. Борис Јованоски од ЈП „Македонски шуми – Црн бор“ изрази надеж дека денеска ќе ги стават овие пожари под контрола.
– Секој момент очекуваме да дејствуваат леталата на Дирекцијата за заштита и спасување и затоа се надеваме дека денеска ќе ги ставиме под контрола, додаде Јованоски.