Со денешната изјава Петре Шилегов свесно се подреди во редот на лица кои свесно нанесуваат штета на безбедносниот систем на Македонија и на нејзиниот углед, стои во реакцијата од ВМРО – ДПМНЕ.
Зоран Заев и СДСМ, се подвлекува во реакцијата, свесно оддадоа државни тајни кои се однесуваат на спремноста и капацитетот на специјалните единици на МВР и кои се однесуваат на безбедносната соработка со пријателски држави.
– Ниту една празна прес-конференција и ниту една празна пријава нема да може да го покрие срамот кој на себе си го ставија Зоран Заев, Петре Шилегов и СДСМ. Тие покажаа дека се спремни да одат против сопствената држава, против нејзината безбедност, да предизвикуваат дестабилизации, а сето тоа само да се доберат до власт без поддршка од граѓаните, се вели во реакцијата од ВМРО – ДПМНЕ.
И оваа пријава која ја поднесува СДСМ, како и претходните, сметаат од ВМРО – ДПМНЕ, е правно неоснована и нема никаква правна аргументација зад себе. Нивната цел, се посочува во реакцијата, е да се правдаат себе си низ пријави кои ги поднесуваат мислејќи дека бројката на пријави кои ги поднеле е поважна од правната аргументација и доказите во пријавите против нив.
Од ВМРО – ДПМНЕ им порачуваат на СДСМ да не се надеваат дека со вакви тужби, кои ни студент од прва година не би ги напишал, ќе може да се пазарат и манипулираат со јавноста.
– ВМРО-ДПМНЕ нема намера да дозволи СДСМ со себе во калта да ги повлече и стабилноста на државата, државните институции и целиот правен систем. Ако СДСМ за себе донела одлука да биде во калта, тоа е нивно право, но немаат право целата држава и сите граѓани да ги носат со себе, стои во реакцијата од ВМРО – ДПМНЕ.