Општина Карпош во писмена реакција на денешната прес-конференција на ВМРО-ДПМНЕ на која беше обвинет градоначалникот Стевчо Јакимовски дека за украсување во Карпош ќе потроши повеќе од сите други скопски општини заедно посочува дека Град Скопје за новогодишните празници улиците ги красеше само до улицата Рузвелтова.
„ВМРО-ДПМНЕ очигледно заборава дека со години по ред Градоначалникот на Скопје Коце Трајановски градот и улиците за новогодишните празници ги красеше само до улицата Рузвелтова, односно до „границата “ со Општина Карпош. Општина Карпош нема да дозволи да остане „зона на самракот“ и мрачна точка во Скопје пред претстојните празници. Затоа решивме Општината да ја украсиме сами. Минатата година украсивме малку, ова година одвоивме повеќе средства за таа намена.
– Се прашувате зошто Опшина Карпош издвоиле толку средства за украсување? Вистинското прашање е зошто градоначалникот на Скопје овој пат издвоил помалку пари? Одговорот е повеќе од очигледен: Затоа што парите ги испотроши за градење споменици, жални врби, милионски евра златни огради, градски плажи и виртуелни галии во Вардар.
– Ние во Карпош не градиме оспоменици, туку парите ги трошиме за да му ги чистиме улиците, да го одржуваме зеленилото, да градиме водоводи, за да му ги реконструираме училиштата,да го обновиме осветлувањето, сé што е обврска на Градот и на Градоначалникот на Скопје. Додека СДСМ зборува за заштеди во буџетот од 204 милиони евра, ВМРО-ДПМНЕ се занимава со лампиончиња, шарени лаги за мали деца“, се вели во реакцијата од општина Карпош.