ВМРО-ДПМНЕ преку соопштение остро ги демантира како манипулации и груби невистини наводите на СДСМ кои денеска ги изнесе портпаролот на таа партија Петре Шилегов.
– Личноста за која СДСМ зборува, не е, ниту пак некогаш била советник на премиерот Никола Груевски. Госпоѓата Јовановска-Типко беше избрана за интервју по објавениот оглас на кој можност за пријавување имаа сите граѓани на Република Македонија, а во согласност со целокупната законска регулатива која се однесува на начинот на избор на амбасадори на Република Македонија. Притоа, во постапката се запазени сите институционални чекори и се добиени позитивни препораки од сите надлежни државни институции, се вели во соопштението.
Воедно, се посочува дека СДСМ свесно лаже, за да создаде забуна во јавноста.
– За разлика од времето кога СДСМ раководеше со Република Македонија, сега на сите граѓани им се гарантирани еднакви можности да ги презентираат своите квалитети и да конкурираат за која било одговорна позиција. СДСМ очигледно жали за времето кога само деца од нивните фамилии имаа можност да напредуваат во кариерата, се вели во реакцијата од ВМРО-ДПМНЕ.
