„Постојните електроцентрали на АД ЕЛЕМ испорачуваат електрична енергија во согласност со потребите на тарифните потрошувачи. Производството на јаглен за потребите на термоелектраните Битола и Осломеј во текот на завчерашниот ден кога се регистрирани големи снежни наноси во постојните рудници се одвиваше во отежнати зимски услови и вработените во овие капацитети вложија натчовечки напори за обезбедување на стабилна експлоатација на јаглен што како секојдневен процес беше прилагоден на актуелните временски прилики.
Впрочем, превземените мерки се сосема вообичаени во услови на вонредни временски околности, со цел да се зачува безбедноста на техничко-технолошката опрема и човечкиот кадар, а истовремено да се обезбеди континуитет во испораката на електрична енергија.
АД ЕЛЕМ поради отежнати услови го исклучи ТЕ Битола 3 во текот на ноќта кога потрошувачката на електрична енергија е најмала со цел да изврши техничка интервенција, и по десетина часа термоблокот повторно беше вклучен во електро енергетскиот систем и тоа во период кога и потребата од електрична енергија е најголема. Овој капацитет веднаш по зафатот продолжи да произведува во согласност со потребите на тарифните потрошувачи.
Во ноември производството на електрична енергија од капацитетите на АД ЕЛЕМ е на планираното ниво и во целост се испорачани потребните количини кон операторот за дистрибуција на електрична енергија за задоволување на потребите на тарифните потрошувачи. Притоа, во тој период за кој зборува СДСМ нема дополнителен увоз на електрична енергија, надвор од оние количини што согласно законот за енергетика го увезува АД ЕВН за покривање на техничките загуби во дистрибутивната мрежа.
Исто така, не е точно дека годинешното произвдство на електрична енергија во РЕК Битола е под 3.000 гигаватчаса. Производството се оптимизира и прилагодува врз потребите на домаќинствата и малото стопанство“, се вели во реакцијата на АД ЕЛЕМ на прес конференцијата на СДСМ.