Разрешениот економски директор на Клиниката за гинекологија, Ваљон Беља, е правосилно осуден на казна затвор од 1,5 години за неовластена изработка, држење и трговија со оружје, потврдија на прашање на „А1 он“ од скопското јавно обвинителство.
Беља признал вина пред судија на претходна постапка во Кривичниот суд во Скопје и му била определена условна затворска казна од 18 месеци, ако во рок од 3 години не го повтори делото. Правосилната пресуда за Беља, според информациите на „А1 он“, судот ја донел на 4 декември 2017 година. Тоа значи дека затворската казна за него може да се активира до 2020 година. Беља бил осуден бидејќи МВР при претресот во неговиот дом пронашла 3 куршуми.
Од обвинителството потврдија дека по спроведени низа истражни дејствија и сослушани сведоци ја отфрлиле кривичната пријава против 10 лица, меѓу кои и за Ваљон Беља, кои биле пријавени за настан од 6 јуни 2016 година. Тогаш Беља, заедно со уште неколку лица, дошол во општината и го барал градоначалникот за да расчитат некаков проблем. Меџити не бил во канцеларијата, а Беља оставил куршум во салфетка.
Меџити и покрај уредните покани, ниту еднаш не се појавил како сведок оштетен во предметот да појасни што се случило, по што скопскот ообвинителство ја отфрлило кривичната пријава, поради непостоење основи дека е сторено кривичното дело. Десетте лица, меѓу кои и Беља, биле пријавени дека сториле кривично дело загрозување на сигурноста.
Министерот за здравство, Венко Филипче, вчера го разреши Беља поради несоодветен јавен настап и нарушени меѓучовечки односи.