Градот Охрид ги распиша конкурсите за доделување на највисоките општински награди и признанија за 2017 година, што се доделуваат по повор празникот 8 декември – Патронот на градот „Свети Климент Охридски“.
Градоначалникот ја доделува наградата Патрон на градот „Св. Климент Охридски“ за животно дело односно долгогодишни остварувања и врвни достигнувања во сите области од општествениот живот што се од особено значење за Општина Охрид и кои имаат голем придонес во нејзиниот развој, напредок и севкупна афирмација во Македонија и светот.
Општинската Комисија за одбележување празници и манифестации и доделување награди и признанија пак ја доделува Повелбата – Патрон на градот „Св.Климент Охридски“.
Право на учество на конкурсите имаат установи, трговски друштва, здруженија на граѓани и поединци, кои во пријавата треба да достават куса биографија и образложение за какви остварувања и придонес станува збор. Исто така, кон пријавите потребно е да се достави и најмалку една препорака од релевантна институција или истакнат поединец од областа за која се конкурира.
Наградата Патрон на градот „Св. Климент Охридски“ се доделува на еден добитник само еднаш и истата не може да се дели меѓу повеќе добитници, додека Повелбата може да се додели максимум на пет добитници. Конкурсите ќе траат до 30 овој месец.