Општина Центар ја запре изградбата на катната гаража до некогашната НИП „Нова Македонија“. Советниците едногласно застанаа зад предлогот на градоначалникот Андреј Жерновски да се раскине договорот за долгорочен кредит склучен од поранешното раководство меѓу Комерцијална банка и Општината.
Три милиони евра вредниот кредит требаше да овозможи на ова место да никне уште една катна гаража за која Жерновски неколку пати посочуваше дека не е во интерес на граѓаните и дека мнозинството центарци наместо гаражи сакаат нивните пари да одат за друго.
Општина Центар наместо споменици, гаражи и барок е ориентирана кон изградба на училишта и градинки.
„Немам намера да ја градам катната гаража, таа не е од интерес на граѓаните. Гаражата би им служела само на 180 административци, но не и на станарите од околните згради“, изјавуваше неколку пати Жерновски.
Во образложението на одлуката за запирање на изградбата на катната гаража со деловен простор, стои дека приоритет се дава на изградбата на ново основно училиште и нов објект на детската градинка „Кочо Рацин“, кој што е веќе започнат.
Во централното градско подрачје има неколку катни гаражи кои се неискористени и стојат полупразни.
Камен темелникот на гаражата со фрлање лопата го постави премиерот Никола Груевски, непосредно пред локалните избори во 2013-та година.
Како што тогаш најави Груевски, ова е дел од проектот за изградба на седум катни гаражи во центарот на градот.