Триесет и две годишен работник во фирма за монтирање скелиња, вчера попладне околу 18 часот бил повреден работејќи на објект во изградба во гостиварското село Топлица.
Според СВР Тетово, М.Џ.од Гургурница, при демонтирање на металното скеле, најверојатно го допрел кабелот од блискиот далновод, по што уследил струен удар од кој М.Џ. паднал во безсознание. На повредниот му била пружена прва помош, а потоа со возило е пренесен во гостиварската болница, од каде е испратен на скопските клиники, но не е во животно загрижувачка состојба.
По пријавата во полициското одделение Галате, јавен обвинител и екипа од Полициската станица Гостивар направиле увид, кој ќе продолжи и денес со учество и на претставници од Државниот трудов инспекторат. Се расветлуваат околностите како се случила оваа несреќа при работа.