Наставници по природни науки и математика од основните училишта во Кочани денеска учествуваа на работилница за запознавање со заедницата за научна едукација во Европа „Scientix“.
Предавач на работилницата во ОУ „Св. Кирил и Методиј“ беше професорката по биологија и природни науки Нада Ѕмбова Донева, која е амбасадор на „Scientix“ со седиште во Брисел.
– Организацијата „Scientix“ промовира и поддржува соработка меѓу наставниците, истражувачите и креаторите на политиките во СТЕМ образованието во Европа. Проектот произлегува по иницијатива на Европската комисија и уште од своето основање во 2010година, е координиран од страна на европската училишната мрежа, со седиште во Брисел од конзорциум од триесет министерства за образование. „Scientix“ е движечка сила за иновациите во наставата и поттикнува соработка меѓу училиштата и наставниците, рече Донева.
Целта на проектот, истакна Донева, е воведување на новини во наставата по природните науки како и професионална надоградба и развој на наставниците, размена на идеи и искуства со колегите од 42 земји од Европа.
Како амбасадор Донева ќе ги промовира активности на „Scientix“ со национални и локални субјекти.